قتلوا نزار بنات
عند الصباح وأنا اتابع جوالي ارسل لي أحد الأصدقاء مسج انهم قتلوا نزار بنات في السجن، لحظتها انفعلت به وقلت، مالك ليش بتروج إشاعات؟ نت أي خبر بتسمعه بتنقله ما عندك مخ وتمييز؟ قلت يستحيل ينقتل بهي البساطة؟ حكالي أنا لقيته بالمجموعات، رحت أتابع بمجموعات الواتس لقيتها كلها بتحكي عن اعتقال وقتل نزار بنات وفي بيسال والناس واجمة مش قادرة تصدق،. قتلوه أه متل ما بيحكوا قتل تحت الضرب والتعذيب، مشكلته ولا اشي إلا أنه بيقول رأيه، بيحكي حكونجي كاتبنجي بس، هي كل جريمته بيتكلم بالي بشوفه ومقتنع فيه بقول للفاسد انت فاسد ما بضربه بسكينه ولا بطخ عليه، بقول للعرص عرص بس هي كل مشكلته والله نزار ازلم منا كلنا.
يا الله ما أبشعها شو هالخبر زلزلني، ما صدقت، ومن ساعة ما أجاني الخبر، وأنا بفتش لعل حد يقولي أن الخبر كاذب غير صحيح، نزار ما بأعرفه بشكل شخصي وتواصل، بس بتابعه معجب بطريقة كلامه بتفق من نمطية تفكيره بمعظم الي بقوله، باعتبره مبدع بيحكي افكار عميقة وقوية كتير ببساطة ابن القرية والمخيم الفلسطيني، ما التقينا ما تكلمنا ما حكينا يمكن هو كمان بعرفني يمكن شاف الي لقاء او قرأ اشي او عملي مرة لايك، لكن في النهاية نزار قتل ببساطة، قتل عشان انتقد فساد مشرش من زمان في السلطة، قتل هيك قدامنا كلنا بس لأنه انتقد بطريقته العفوية البسيطة التنظيرية العميقة فضيحة اللقاحات، أنا ما كتبت ولا حكيت عن اللقاحات واعتبرتها جزء من المنظومة الفاسدة التافهة، والمرحلة أهم انه نقف عندها ولازم نفكر كيف نبني نظامنا الفلسطيني، لكن بعد قتل نزار بقول طز بنظامنا الفلسطيني، طز بسلطتنا، طز والف طز لأنه احنا ناس ما بنستحق الحياة، احنا ناس ما بنفع نكون بني ادمين، وقتلة نزار بالمقاطعة قعدين بشربوا نخب دمه بهستيريا مجنونة مقززة، شو احنا مين؟ معقول فلسطينية؟ معقول فينا دم فلسطيني بيجري؟ ينقتل واحد منا بس لأنه بقول رأيه؟ ولسة بدنا نتحرر؟ آه يا وجع آه بس.
